Von dr gueta, alta Zeit
Andauernd schwätzet d Leut,
von dr gueta alta Zeit.
Doch, i woiß net, liabe Leut,
was i drzua soll.
War dui gueta, alta Zeit
eigentlich wirklich so toll?
Früher send doch d Leut
arm gwea ---- gega heut,
oder stemmt des vielleicht net?
Was hot mr denn scho ghett?
En Haufa Gschäft ond fast koi Geld
ond oft schier nex zom essa.
Ihr Alte müeßt doch des noh wissa,
oder hent Ihr´s scho vergessa?!
De ganz Woch hot mr koi Wurscht
auf em Tisch zom veschper gseha.
´s oizich, was d Leut ghett hent,
des send a Haufa Kender gwea.
Zeah, zwölf Kender om da Tisch,
des war domols so normal.
Dr Storch hot früher nex schö´s ghett,
des ischt mr ganz egal.
Ond no schwätzet Leut
emmer von dr gueta, alta Zeit ...
Überhaupt isch´s ganze Leaba
früher net so oifach gwea.
Älle dia Bequemlichkeita
hots früher gar net gea.
Koi Auto, koi elektrisch Licht
ond au koi Eise´bah.
Früher bischt halt älles g´lofa,
manchmol woiß dr Herr wo na.
Sechs Däg lang jede Woch
ond jeden Dag zwölf Stond
hot mr früher schaffa müeßa.
Ond war drbei noh gsond.
Ond zu dem, was mr vrdeant hot
en dr Stond en deare Zeit
send manche Sacha teuer gwea.
Viel teurer, als wia heut.
An Kloider hot mr net viel ghett,
lasset mi bloß en Ruah!
Ond für da Sonntig ond da Wärtig
a gotzigs Pärle Schuah.
Ond no schwätzet Leut
emmer von dr gueta, alta Zeit ...
Heut macht mr, was noh goht,
älles bloß noh maschinell.
Heut wird bloß noh ghudlet,
des hoißt mr rationell.
Älles dreht sich heutzutag
bloß noh om ´s liabe Geld.
´s ischt nex gemüetlich´s meh,
wo mr na guckt auf dr Welt.
Früher, wo mr dia Mascheena
noh net ghett hot, hent d Leut
em großa ganza füranander
meh Zeit ghett, als wia heut.
Jeder sprengt ond duet wia narret:
Zeit ischt Geld! So hoißts doch heut!
Arm ischt mr früher gwea, doch ebbes
hot mr emmer ghett: A bißle Zeit!
Ond was dees betrifft, Ihr Leut,
war´s scho de guet´, alt´ Zeit!
Thema